Ka përfunduar dëshminë dëshmitari i 78-të i ZPS-së, ushtaraku amerikan Steven Russell në gjykimin ndaj ish-krerëve të UÇK-së.

Ai u morë në pyetje nga trupi gjykues gjatë fundit të dëshmisë së tij në Hagë e cila filloi më 19 gusht 2024.

Dëshmitari tha se shqiptarët dhe serbet raportonin tek KFOR-i edhe për rastet që kanë ndodhur para se të vijë misioni i OKB-së në Kosovë.

“Kishte raportime si nga ana e serbeve dhe shqiptarëve. Raportonin për varre masive dhe donin që ne t’i hetonim. Pra, gjera të kësaj natyre. Raportonin për krime kishin ndodhur edhe para se të mbërrinin forcat e NATO-s dhe thonin që ja këtu janë varrosur njerëzit ose janë varrosur atje. Jemi përpjekur t’i hetojmë. Ky ishte një lajm i madh për këdo që donte të hetonte varre masive, të gjente trupe të varreve masive. Zakonisht këto raporte vinin nga fshatarët e zonave ose nga personat që kishim kontakte”, tha dëshmitari, raporton ‘Betimi për Drejtësi’.

Dëshmitari gjithashtu tha se kishte shqetësime në Gjilan edhe për praninë e ushtarëve rus të KFOR-it.

“Nganjëherë merrnim ankesa për sjelljen e patrullave ruse. Ia raportonim komandantit rus. Më pas e gjetëm një formë dhe vendosem që të bënim patrullime të përbashkëta”, tha dëshmitari.

Ai shtoi se kur qytetarët shikonin ushtar amerikan në automjetet ruse, atëherë ndryshohej sjellja. Dëshmitari tha se vlente edhe e kundërta kur shkonin në fshatrat serb.

Në pyetjet e gjyqtari Fergal Gaynor, dëshmitari tha se përpiqeshin të ndalonin aktet e dhunës dhe të krijonin një mjedis ku mund të krijoheshin më pas institucione sipas direktivës së OKB-së të cilat më pas të fuqizoheshin dhe të vinte dita që NATO të mos ishte e nevojshme aty.

Pyetje shtesë për dëshmitarin pati edhe mbrojtja e Thaçit përmes avokates Nina Tavakoli.

Duke u përgjigjur në pyetjet e saj, dëshmitari tha se e kishin për detyrë që të ndalonin çdo funksion policor të UÇK-së ose Qeverisë.

Me kaq përfundoi dëshminë ky dëshmitar e që seanca më pas do të vazhdojë më dëshminë e dëshmitarit të 79.

Gjyqtari pyet dëshmitarin se pse krimet iu atribuoheshin UÇK-së, ai thotë se ka parë vrasje që nuk mund të behshin nga njerëz të zakonshëm.